الموضوع: قال حقوق المرأة قال (وجهة نظر باللهجة الحجازية)

[align=center]تحيتي أكتبها بماء الورد تفوح عطرا لتختلط رائحتها برائحة الكادي والياسمين لهذا المنتدى الجميل

وللأعضاء الأجمل ..

أسوق إليكم مقالا يحتوي وجهة نظر حول حقوق المرأة بأسلوب فكاهي باللهجة الحجازية ..

باللهجة الحجازية ؟؟؟

أيوه يا بويه باللهجة الحجازية ..

لا أطيل عليكم ..

[/align]





[align=center]قال حقوق المرأة ... قال [/align]
[align=center]

ما يرفع ضغطي شي زَي كلمة حقوق المرأة .. وبالذات في السعودية .وهادي المشكلة طلعت متى؟ بعد 11 سبتمبر .... سبحان الله .. يعني كانوا من ألف وأربعمية سنه نايمين ... وفجأة كده صحيوا وقالوا: وه ياندامة .. إيش هادا؟ أتْـرِنُّو إحنا لنا حقوق؟! مادام كده ... الإنتخابات البلدية ليه ما نشارك فيها؟ وليه ما نروح هناك ونرقع بالصوت؟

يا أختي حلال عليكم البلدية كلها .. يعني إيش تبغوا تسووا؟ تحطوا ضوابط إصدار الرخص لمحلات الحلاقة مثلا؟ والا تناقشوا سفلتة الشارع اللي يودي على بيت أم إبتسام؟ والا ليه الشارع الفلاني ما فيه كوفيرة مغربية وكل اللي فيه مصريات؟ يا أختي ريحي راسك .. اذا كثير من الرجال ما سوُّوا حاجه ... بالله عليكي حتسيبي بيتك وعيالك وشغلك ... عشان تناقشي مشروع إنتخابي؟ هادا من تمام الفضاوه.

طيب قولوا لوح ْ ده زواج أختها الليلة: بلاش تروحي للكوفيره اليوم يا مدام وتعالي نناقش حقوق المرأة أو نحضر المجلس البلدي و نتخذ قرارات مهمة .. وأترك لكم جوابها ... إيش يكون

أما عن حقوق المرأة في السعودية ..... فياسيدي الست هنا لها حقوق وواجبات ما تتنازل عنها. مثلا: في بلدان كثير عربيه وأوروبيه تلاقي شحط طويل عريض جالس في الباص .....وقدامه وحده في الشهر التاسع واقفه على رجولها وشايله طفل تاني على كتفها ... إن الشحط يتحرك؟ ... أبدا...إن الثور يحس؟ ...........لايمكن. لكن هل يمكن يحصل هادا في السعودية؟ أبدا .... واللي يبغى يجرب ...... الطريق قدامو .... يا عمي العملية كلها دلع حريم في دلع حريم ... رايح أعطيكم بعض الأمثلة وقولوا لي مين اللي آخِد حقُّو بالكامل وزياده؟ وهل عندنا المرأة متساوية مع الرجل .. والا هي أحسن مِنُّو؟



قال حقوق المرأة ... قال.



منظر عام

رجال محترمين زي الورد واقفين أمام صراف في بنك .. وتِجي أختنا في الله (اللي يقولو إنها مهضومة الحقوق) تتقدم للصراف مباشرة ولا على بالها من الطراطير اللي واقفين من ساعات .. وبعضهم مستأذنين من عملهم. طيب ليه ما توقِّف تِمسك سِرا ورا عشرين بنغالي... وتلاتين باكستاني... وخمسين سعودي... واثنين معقبين معاهم شوية فواتير مقاس إكس لارج ... وإذا أحد كلمها وقال لها أتفضلي يا أختي ترد عليه وتقول: لا، معليش. المرأة زَيّ الرجال ......... خليني في الطابور ..... زَيِّي زيكم؟! .... ليش ما تقول كده؟! ... والا هي تماحيك وبَس! ونفس المنظر في الجوازات .......... والأحوال .. والتأمينات .. ويقدر أحد ... يقول إنه من ظهر أبوه .... يفتح فمه؟ ... على طول يسمع العبارة الشهيرة ..... ( عيب عليك ..... إنت ما تستحي؟ .... هذه حرمة...إنت ما عندك أهل!)) .....ويضطرالراجل إنُّه ينكتم ويسكت ..... بل إن المرأة تشفع للراجل جوزها عشان يتقدم على الرجال الباقين. في المطار .. مثلا .. ما تشوفهم يطلِّعوا العوايل أوَّل .. وبعدين بقية الركاب؟

قال حقوق المرأة ... هه!

اقتصاديا

شوف الراجل... السبع... الغضنفر... المفتري...لُه ثوبين أو ثلاثة في السنة ... يروح بيها العمل، ويحضر بيها عزايم وزواجات، ويقابل بيها كبار المسؤولين، الخ، الخ، الخ. والمرأة بسلامتها .... بقيمة أدوات مكياجها فقط... تقدر تفتح محل خياطة رجالي محترم. ويا ريت تحط من مكياجها في البيت ...... لأ. دا بَس للخروج ... وقيمة صباع روج والا علبة بودره تساوي قيمة جوال جوزها ...... وكمان ازيدك من الشعر قصر .. مو بيت ... من حقوقها فستان لكل فرح... و مكياج... و كوفيرة...وجزمة ..........وشنطه. وكمان خُدوا هادي ......... سابع بنت عمي ..... ملكة أخت جارتنا ........ ولازم هديه ... واللطخ يدفع ..... مو مهم الفلوس جات من فين ....... المهم يدفع ....... والدنيا ممكن تنقلب على الراجل واللي خَلَّفوه علشان موضوع (مهم وحيوي) زي كده ...



قال إيه! حقوق المرأة.

نفسيا

الزوج مطالب يكون أربعة وعشرين ساعة رومنسي ومبتسم ، ولا يبقى جلف وإبن ستين في سبعين. ويعني إيه عنده مشاكل في العمل؟! والا أقساط متأخره؟! و ا لا فواتير؟! والا مقاضي ما يعرف كيف يجيبها؟! مو مهم .. واجب عليه إنه يرجع من العمل للبيت مروِّق ومبسوط وبَس .... والست بسلامتها من ساعة ما يرجع من عملو .. وقبل ما يفصخ حوايجو: شوف بزورتك ( لاحظوا .... بزورتك ) طفَّشوني ... إيش رأيك نغير غرفة النوم؟ التلفون ما فيه حراره .... جاتني رساله على الجوال يقولوا الفاتوره طلعت .. أَلحق سّدِّدو قبل ما يوقفوه عن الخدمه ... .... ... ... ومع هادا كُّلو ..لازم يبقى رومانسي.

بينما هي وبكل سهولة تصحى بسلامتها في الضُّهر...وتجد الكارثة الكبرى....يوه ...ما عندنا صلصه...وبكل رقة تتصل...ألو ألو ...أبو خالد موجود؟ ممكن أكلمه لو سمحت؟ ألو ...... إيوه... أنا .. حتكون مين يعني؟... المهم ...... جيب معاك غدا ... ماهو إنت يا فالح نسيت تجيب صلصه معاك أمس. ولإنه موفاضي.. و قرفان من العمل.. يصدق المسكين إنه هو إللي نسي ويقول بكل شجاعة ..... طيب.

وفي رمضان: تعبت ...أوف .....إنت داري عن حاجه؟ أنا أبغى خدامة... أنا خلااااااااص .... ومن ثالث يوم رمضان .....مقاضي العيد من جده ..........أختي جابت ملابس لها ولعيالها .. إيش أقول َّ ك بس ... وخ ُ د مشاوير لليييييييييييل ... والراجل المسكين لما ينزل السوق مع مراتُه ما يقدر يشتري ولااااا شَي لنفسو، لأنو طول الوقت ماشي وراها من دكان لدكان، وشايل زنابيل إلين ما كتفو يتخلع. وهي تطالع فيه وهو يتطوَّح من ثقل الزنابيل .. ولا تقول ل ُ و فزعه .. حتى لو بالكِدِب. وآخرتها بعد ما يرجع البيت تقول لو إنها لِسَّه ما أشترت ملابس العيد!!!!!! وإذا فكَّر ينزل السوق لحالو عشان يشتري شي لنفسو ... على طول يكون مشبوه .. إيش ينزلك لوحدك وسط الحريم؟ ... طيب إنت مو كنت معايا في السوق ... أحد قال لك لا تشتري؟

قال إيه؟ ..... حقوق المرأة.

شرعا

المرأة لها حظ من أبوها ..... وحظ من زوجها .. هادا غير أمها .. وأخوانها .. وأبناءها .. والراجل مطالب إنو هو اللي يصرف عليها مهما كان عندها فلوس.

وثانيا: الرجال لازم يروحوا للمسجد خمس مرات في اليوم .. جمع وجماعات .... حر وبرد .. ليل وصبح .. لازم يروحوا ..... بينما الست تصلي تحت المكيف .... في غرفتها .. وأجرها زي الرجال تماما ..... ياعيني ......... يا عيني .. والله الإسلام أعطاكم كتير ..... وياريتو يِبان فيكم.



إجتماعيا

الست كل أسبوع تخرج عند صاحباتها وما ترجع إلا متأخره .. وطبعا جوزها هو اللي يوديها ويجيبها .. (يعني تبغاني أروح مع السواق في هادا الليل؟!) ... وسعادتها ما تبدأ تتمكيج وتسرح شعرها إلا بعد العِشا .... وكل شويه تقول :خلَّصت ..... وهي ما سوت شي لِسَّه ... والراجل الغلبان جالس على أعصابو يستنيها تخلص .. أخيرا تقول لُو: وي! إنت ما نزلت السياره؟ .. وَي ... هيا عشان لا نتأخر. المسكين يجري في الدرج (عشان ما يأخرها) .. ويشغل السياره ... ويستَنِّي بسلامتها مو أقل من ربع ساعة حتى تشَرِّف ... وطبعا ممنوع يقول لها: (إيش أخَّرِك؟) والا يا ويلو ... وبعد ما يوصلها .. يستحيل يغتنم الفرصه ويروح هو َّ كمان لأصحابو إلين هي تخلص سهرتها .. (وَه! كيف تروح؟! ومين يقعد مع البزوره؟) .. والماكياج اللي حطتو للستات يتمسح نصو من الطريق .. والباقي بعد ما توصل البيت ... يعني الرجَّال ما يلحق يشوف مِنُّو شي.

وإذا بعد شهر أو شهر ونص جات لو عزيمه في زواج ... أو فكر يخرج ليله مع أصحابو .. وبلَّغها من بدري عشان ما ترتبط بموعد مع صاحباتها في نفس الليله وتخرب عليه .. (هو إنت ما تعرف ت ِ قر في البيت؟ كل ليله معزوم؟ شوفي يختي الراجل .. ما كإنُّو عندو بيت ولا بزوره)



لكن مع دا كُلُّو .. برضهم الستات أحيانا نحس إنهم غلبانين .. يمكن عشان قلبنا طيب![/align]


[align=center]موضوع منقول .. حقوق الطبع محفوظة لصاحبها .. مع إعتذاري لعدم وجود مصدر [/align]

يعطيك العافية يامنافح

ايوه يا أخوية موضوعك روعة كدا والا بلاش

لا تحرمنا من مواضيعك يا أخوية نحن في إنتزارها


تحياتي لك

موضوع مميز وحلو كتير ( لاحظ كتير )

انا كنت اقرأ واضحك طول الموضوع ... الصراحة ضحكت كثير مع كل كلمة

اشكر لك جهودك ... والى الامام

هههههههههههههه
يعطيك العافيه بالحجازيه

ههههههههههه


الله يعطيك العافية

[align=center]الاخوة الأعزاء

العـــــــاقل

دكتور الكمبيوتر


صفا الطهيان

جبل حزنة


أشكر لكم مروركم وتعليقاتكم


والراجل ما قال إلا الصح ..[/align]

ههههههههههههههههههههههه

وه يا ندامه !! حرام عليك مو كل الحريم كدا حركاتهم ..

أشكرك على موضوعك الحجازي الحلو..

والله يعطيك العافيه ..

هههههههههههههههي

يعطيك العافية

اقتصاديا

شوف الراجل... السبع... الغضنفر... المفتري...لُه ثوبين أو ثلاثة في السنة ... يروح بيها العمل، ويحضر بيها عزايم وزواجات، ويقابل بيها كبار المسؤولين، الخ، الخ، الخ. والمرأة بسلامتها .... بقيمة أدوات مكياجها فقط... تقدر تفتح محل خياطة رجالي محترم. ويا ريت تحط من مكياجها في البيت ...... لأ. دا بَس للخروج ... وقيمة صباع روج والا علبة بودره تساوي قيمة جوال جوزها ...... وكمان ازيدك من الشعر قصر .. مو بيت ... من حقوقها فستان لكل فرح... و مكياج... و كوفيرة...وجزمة ..........وشنطه. وكمان خُدوا هادي ......... سابع بنت عمي ..... ملكة أخت جارتنا ........ ولازم هديه ... واللطخ يدفع ..... مو مهم الفلوس جات من فين ....... المهم يدفع ....... والدنيا ممكن تنقلب على الراجل واللي خَلَّفوه علشان موضوع (مهم وحيوي) زي كده ...

ههههههههههههههههههههه

ايش هادا ياواد يامنافح ؟!

والله دقيت على وتر قلبي الحساس

الله يسلمك

ومررررره تانيه أدينا وحده زيها

[align=center]أخيتي مبدعة الخيال

أخيتي الشامخة

أخي وصديقي أسد حزنة

لكم كل الشكر والتقدير على مروركم وإضافتكم الرائعة

ويكفيني سرورا أن رسمت الابتسامة على أعضاء منتدى قريتي العزيزة ..

وإن كان من يشاركني الرأي حتى من أخواتنا .. فمع ذلك واعترافا بذلك .. أقول بأن

الأم والزوجة والأخت والبنت كلهم في أعيننا دونهم أرواحنا .. و ما تلك الكلمات التي قالها أخونا الحجازي

وإلا وخلفها الحب الصادق .. والتي ختمها في آخر مقاله

لكن مع دا كُلُّو .. برضهم الستات أحيانا نحس إنهم غلبانين .. يمكن عشان قلبنا طيب!

وأضيف ..

وبرضه ارحمونا شويه من كتر الطلبات هادي .. اليوم فيه فلوس بكرة على الحديدة !!!


شكرا لكم .. [/align]