:SnipeR (18):حضور بعد غياب:SnipeR (18):
حينمـا تسكت جوارحنا عن الكلام
ندع الحديث لأقلامنا
تنزف شيئا ً مما تكابده
علـّـها تستريح
وأسأل نفسي
ياترى من جعلني هكذا ؟؟
هل هي الحياة ؟؟
أم هي قسوة البشر !!
أو ربما أكون أنا من أخطأت التقدير !!
فأسأت التدبير !!
لكن " الله " ليس غافل عن عبده الفقير
أبكتب لك مع ابياتي كلام مشفـرٍ تشفيـر ...
لعلك تفهـم المعنـى ورمـزٍ صاغـه السانـي
انا اللي عاشق خلٍ عشق غيري بلا تقديـر ...
تمنيتـه وهـو ناسـي واحسـب انـه تمنانـي
سقاني كاس بيدينه طلع كاس الهوى تخديـر ...
احسب مالكه قلبي وهـو مـع واحـدٍ ثانـي
انا نفسي على الذله تعاف الزين لو هو غيـر ..
واباطـا قلبـي برجلـي إذا إنــه تحـدانـي
أنا أبنسى عنا الماضي وأبرحـل دونمـا تبريـر
عسى الله يسعـد أيـام العزيـز اللـي تمنانـي
تبي تدري وش القصه , وش المعنى , وش التفسير
وش اللي سهّر عيوني وخلا النـوم مـا جانـي
وش اللي كسّر الخاطر كسور(ن) ما لهن تجبيـر
وش اللي أرخص دموعي بجوف الليـل بكانـي
أبرسل لك مع ابياتي علامات(ن) بهـن تبصيـر
وابوصف لك معالم جرح ينزف وسط وجدانـي
ابرسم لك شظايـا خافـقٍ متكسـرٍ تكسيـر
وابنظم لك قوافي شعـر فيهـا قصـة احزانـي
وابكتب قصتي معها عذر وارفع لـك التقريـر
انـا المظلـوم لكنـي بمفهومـك انـا الجانـي
أنا شفتك على دربي ومن اجلك عكست السير
وانا مدري وش اللي يـم ذاك الـدرب ودانـي
لمحت اسمك مثل نجم(ن) على نوره يطير الطيـر
وانا من يوم شفت اسمك فرحت وجيت لك عاني
تقابلنا انا وانتـه علـى صفحـه بهـا تسطيـر
تهلي بي مـن اولهـا وبآخـر سطـر تجفانـي
لقيتك تنتظـر غيـري حقيقـه مابهـا تزويـر
وانا اللي كنت اظن انك على الصفحه تحرانـي
تعيش الحلم مع صوره على التصغير والتكبيـر
تعزي قلبك العاشـق وفيـك القلـب عزانـي
سبحت بداخل اعماقك وغصت بغبة التفكيـر
ولاتحسب هواجيسك مـع اللـي راح تخفانـي
حملت المسك باليمنى وباليسرى نفخـت الكيـر
تداوي جرحٍ بقلبـي وتفتـق جـرحٍ أشقانـي
بخفي جرحك الدامي وابدفـن سرنـا بالبيـر
وابنثر ذكرياتـك شعـر للهاجـس تغشانـي
واذا نادمت هاجوسي ابذكر عشرتـك بالخيـر
وابدعي لك إذا هب الجنوب وهيض اشجانـي
عسى دوم(ن) معك يمشي رفيق بدربك التيسير
وأنا ماضيـع مـن بعـدك ولـي رب تولانـي
أنا يا صاحبي برحل وسامحنـي عـن التقصيـر
أنا نفسي تعاف الزيـن إذا مـا كـان يبغانـي
وتبي أفرز لك المعنى على الصافـي بـلا تكثيـر
واسّبِك صافي المعنـى بقالـب بيـت وحدانـي
خلاص الوقت علمني حفظت الدرس بالتكريـر
نصيحه لا تجي وان جيت مـا ظنيـت تلقانـي
